- Teacher: Tulasi Kumar Joshi
- Teacher: Karthik Sharma K
काव्याध्ययनं सदुपदेशादीनि नानाप्रयोजनानि प्रापयतीति विदितमेव विदाम् । रसानन्दस्तावदस्य परमं प्रयोजनम् । तस्मात् तदिदं बहुमतं वर्तते । अपि च, काव्याध्ययनं भाषाज्ञानस्य द्वारम् । यदि कश्चन काव्यभागः प्रतिपदं प्रकृतिप्रत्ययविवेकेन सन्धिसमासादिचिन्तनेन च सहितम् अधीयेत तर्हि भाषा सम्यग् अधिगता भविष्यति । अत एव शतश्लोकेन पण्डितः इत्युक्तिः प्रथतेतमाम् । तस्मात् साम्प्रदायिकाध्ययनपद्धतौ कतिपयानां सत्काव्यानाम् अध्ययनतः पश्चाद् एव शास्त्रे प्रवेशं लभन्ते स्म छात्राः । तदेतन्मनसि निधाय अस्मिन् शास्त्रपाठ्यक्रमे आदौ काव्यभागोऽयं निवेशितोऽस्ति ।
तथा च विद्यार्थिनोऽत्र कालिदासप्रणीतस्य रघुवंशमहाकाव्यस्य द्वितीयं सर्गम् अध्येष्यन्ते । अत्रादौ महाकाव्यलक्षणं कविकाव्यपरिचयः तद्वैशिष्ट्यम् इत्यादीन् मुख्यतमान् कांश्चन अंशान् उपवर्ण्य प्रथमसर्गादिस्थाः दश श्लोकाः पाठयिष्यन्ते, येन अस्यां कृतौ छात्राणां प्रवेशः अनायासलभ्यो भविष्यति । अत्र अध्यापनविधिः संस्कृतमाध्यमेन एव भविष्यति ।
- Teacher: Ramakrishna Pejathaya